header1200.png

Schnitzelbänke Fasnacht 2004 Motto "Bau-Stau"
faszeitung2004
 
 
 
 
Ändlech isch's Bauschtler Pub wieder e Hit
sit dr Arno s'säge hett und's wieder Wettbewärbe git
A eim hett au dr Dobler Thomi s'grosse Glück gha
und es Mountain-Bike gwunne dä gfitzti Maa
Mir hei au mitgmacht und hei öis (fascht) betrunke
Gäu Thomi, Strongbow isch fein, hesch au scho eis trunke ?


Z'Egerkinge im Gäupark hei si es nöis Coop bout
scho mänge Bauschtler het dört sini Sache ghout
Coop het öis e chli dr Spass verdorbe
und dr Jeggli us öisem Coop abgworbe
Ä r säuber isch sicher froh, mer mache e Wett
dass är jetz meh Uslauf vo deheime hett

Är glaubi nid a Horoskop het dr Hafner Jörg plagiert
wo är sich im DRS3 im Bäsefrässer aus Kandidat probiert
Au mit Johrgang 69 sig är no vou im Saft
ä r strotzi nume so vor Säubstvertroue und Chraft
Ä r sig sozäge dr bescht, e Star, e Super Maa
ah d'Frog het är übrigens fausch beantwortet gha

Dr Fasnachtsumzug z'Zofige isch au no e Hit
drum mache mir mit de Säulischränzer mit
Dass es öis dört längwilig isch gsi, isch nume es Grücht
schliesslich hei mir für Stimmig gsorgt, wo dr Wage het grücht
S'nöchschte mou würde mir gärn chli länger mitgwaggle
und dr Wage nid scho nach 5 Minute abfackle

Dr Heutschi Hans, e Maa mit Pfiff
Im Wahlbüro het är aues im Griff
Bir Coop-Tankstöu gseht das angerscht us
Do chunnt är mängisch nid so drus
Bim zahle ar Kasse vergoht im schäu mou s'lache
sis Auto rollt dervo, und tuet i Schmelzihof krache

Nach de Bundesrotswahle muess CVP neui Sache uspropiere
ä s wärde Partner gsuecht wome mitne cha kooperiere
Wie immer isch Bauschtu im Trend und zeigt sich kreativ
dr Enzo und s'Renate spränge d'Parteigränze sehr aktiv
Wenn das so wyter goht lütet uf dr Berete scho gli mou s'Lüti
und vorem Elvira Bader stoht dr Ständerot Bütti

Bir Sändig Music Star hetts au es paar Skandäli gäh
s'Schwiizer Färnseh hett dr Fröhlich us dr Jury miesse näh
Dr Blick hett gschriebe, är chämi gli vo de Fans dra
derbi hätt är nume Sexföteli vor Daniela wöue ha
zu dene erotischi Föteli seit denn Daniela Nein
aber simer ehrlech, das interessiert doch kes Schwein

D'Bärner Kantonalbank isch jetz bim Lappert izoge
und hett neui Rümlichkeite im Rössli bezoge
D'Raiffeise hett ir Goudgass e Bankomat installiert
und d'Bank im Thau hett e nöie Name präsentiert
Bir Tätigkeite vo dene Banke si mer scho chli verschrocke
z'Bauschtu müesse jo irgendnöime Gäudhaie hocke.

S'Verkehrskonzept vom Thal, das isch geniau
zwüsche föifi und sächsi stohsch ir Chlus im (Bau-)Stau
E gueti Idee hei d'Höckeler am Chluser Märet usprobiert
si hei nämlech auti Isebahnwäge uf de Gleis platziert
Mer si dr Meinig, dass die Wäge für immer dört sötte stoh
statt im Stau z'warte, chönntisch dört für nes Bierli verbi goh.

D'Amerikaner döi's jetz nümme länger lüüge
Aus nöchschts wei si ändlich (wieder) uf e Mond flüge
Das würde mir natürlich aui begrüesse
Chönnte si doch Ihre Bush grad mit ufe schiesse
Das würdi doch aune am meischte bringe
und viellicht tuet är jo dört dr Bin Laden finge

Dr Gasser Didi wott sini Kollege belehre
Wie me s'Auto mit dr Handbräms cha chere
z'Andermatt ufem Parkplatz tuet er d'Handbräms zieh
Dä chare dräit sich um d'Achs wie no nie
Wo är zum Stillstand isch cho, het er nümme glachet
Bim letschte "turn" isch är is Auto vom Bongo krachet

Zyt isch s'wichtigschte uf dr Wäut
No vüu wichtiger aus aues Gäut
Ö isi Skifahrer si do dure Idealischte
Sie si meischtens vüu länger uf dr Pischte
Dr Grund dervo hei si jetz endlich entdeckt
Im nöie Skiazug isch e Fallschirm verschteckt

Dr Rüti Max schtöut mit sine Manne
ufem Kornhuusplatz e riesegrossi Tanne
Bim erschte Dezämbersturm, es isch e gruus
gheit die Tanne scho uf's Knuschperhuus
wenn Dir s'nöchschte Johr no es grössers Bäumli stöuet zum plagiere
Müese mir denn haut zerscht haub Bauschtu evakuiere

Vo au dem Stress het dr Lappert langsam gnue
Zwüsche Wiehnacht und Neujohr het s'Chrüz jetz zue
Doch wenn genau gluegt hesch, hesches erkönnt
Dass ir Chrüz-Stube trotzdem s'Liecht het brönnt
Dass si aber nid Iibrächer bim chlaue vor Kasse
Dass isch dr Lappert mit sine Kollege bim Jasse

Mit Coop-Märkli isch das eso nes Eländ
Und denn säge si es sig au no Made in Switzerland
Fascht jede Huushaut hett es paar Pfanne erworbe
Auso öis hett das Gschtürm fascht s’Ichaufe verdorbe
Für eusi Fasnachtszytig döi mir keni Märkli annäh
Es git au kei Rabatt, dir miesst eifach 3 Stutz is Kässeli gäh.

Merz und Blocher aus Magischrate rüefe d’Fraue gschtört
Dass isch doch Verrot a öis und de Junge meine si empört
Es hett vöu Wahlgäng brucht, bis me gwüsst hett wär wird regiere
Do isch’s bi öis ir Umgäbig eifacher bis eine ir Regierig cha plagiere
Dr Enzo, dr Jörg und dr Fabian hei öis Stimmbürger schön verwütscht
Und si stüu und heimlich i ihres nöie Ämtli ine grütscht

Dr Guldimaa hett früecher die Lüt aube fascht chli ploget
Und hett se vorem hürote über persönlichi Sache usgfroget
Nachem Jäggi sire Hochzyt isch es für e Guldimaa schnäu mou klar
S’Zölibat isch nüt für ihn, är wott au vore Traualtar
D’Schöfli si dr Chüuche scho lang dervo
Jetz wärde ihre au no d’Hirte vo de Fraue gno.

Dr Kaiser Rolf gsesch z'Adelbode ufem Berg umeschmore
Nachere Wanderig het er si Hund verlore
Aus sueche nützt nüt, wöu sis Hündli hautet ihn zum Narre
Denn dä isch längst eilei mitem Gondeli abegfahre
dass dä Hung ellei is Tal het gfunge isch nid wäg de Geischter
Mir glaube eifach, er isch schläuer gsi aus si Meischter

Bim Inseli het me im letschte Johr recht Inveschtiert
Mit emne nöie Spielplatz het me de Platz verziert
Doch wo mir dä Platz gseh hei, si mir nid richtig drus cho
was die blächigi Hügle söue, chöi mir nid ganz verstoh
Dermit dört de Ching bim spiele nüt cha passiere
Müesse si jo zerscht Helm und Schoner montiere

Chürzlich hei mirs us de Medie vernoh
dr Ex-Miss Nadine Vinzens hei si s'Billet gnoh
Churz druf abe hei si au d'Politiker verwütscht
au die si mit zwöi Promille im Züg ume grütscht
Jetz froge mir öis, wie die öises Land döi regiere
wenn si die ganzi Zyt bsoffe im Bundeshuus referiere

Winstons Club Bilder

slogan_small300.png