header1200.png

Fasnacht 2005

Der Winston's Club auch dieses Jahr wieder
"vou dr bii" mit Ihren legendären Schnitzelbänken

 
Schnitzelbankzeitung
 
faszeitung2005.jpg
 
 
 
 
    Was si denn i öisem Komitee für Schlofmütze
Dass si weder Press no Internet für d’Wärbig nütze
Mir hei gmeint, es würd öis öpper d’Fasnacht verdärbe
Wöu niemer mit em Motto i de Strosse tuet wärbe
Doch plötzlech heimer erfahre, dass doch no e Fasnacht wird si
Drum isch dr Winston’s Club au das Johr wieder „vou derbi!“
     
  Du suechsch es sexy Négligée
Bim Judith wirdsch sicher öppis gseh
Und villicht bruchsch es modisch’s Top
Bim Ritter Beni isch sicher kei Flop
Doch s’absolute Kauferläbnis, Gott sei dank
Fingsch im Greti siner Garage in Houderbank
     
  S’Kaiser Susi isch jetz im Ruehestand
Mit 81gi isch si us dr Eintracht verbannt
Dr Kunz Mäsu het d’Eintracht übernoh
Und sofort hei’s d’Huusfraue in Beschlag gnoh
S’Mittagässe döi d’Fraue jetz wieder verschpötet serviere
Wöu si bim Mäsu no die feine Crèmeschnitte müesse probiere
     
  D’Holzfluehvereinigung hett Manne mit Pfiff
Si hei Bauschtu und gli ganz Europa im Griff
Nachdäm si vor chruzem hei d’Franzose quält
Hei si jetze d’Oeschtricher aus ihri Opfer gwäut
D’Rach a de Habsburger sig s’Ziel vor Aktion
Mir glaube z’Bauschtu stoht gli s’Rieserad aus Attraktion
     
  D’Oltner döi jetz ihri Nutte vertriebe
Dr Strossestrich vor Schwiz darf nümm dört bliebe
Bi öis sett me jetz d’Umfahrig vor Chlus forciere
Dermit me das Gwärb ir Chlus cha iquartiere
Dr Willy chönnt blöffe, z’Bauschtu würdi wieder öppis laufe
Und d’Judith chönnt dene Fraue d’Reizwösch verchaufe
     
 
Sit öise Bagatello-Simi e VIP worde isch
Si si z’Mümliswil hinge grad e chli niidisch
Pornostare und dr Mister Gay chöme usem Vaterunserloch
Und sogar e Bauschtler isch i dere Sach im Hoch
Dr Studer Dani tuet e Smart aus Hauptpriis garantiere
Wo dr Sven, si Sohn aus Mister Gay, tuet abkassiere
     
  Der Turnverein meint, dass es läng
D’Ritthaue z’fülle mit der Spider Murphy Gäng
Doch leider si fasch keini Fäns am Tobe
Jetz muess öppis go am Unterhautigsobe
Dr Lori weiss, wie bringt me d’Lüüt zum johle und lache
Und macht e Abgang, dass nid nume d’ Balke krache
     
  Aus Pächter vom Beizli ir Tennishaue chasch nid plagiere
Scho mänge het sis Glück aus Wirt im Moos wöue probiere
Doch eine het gmeint är chönn das besser aus die angere bringe
Dr Kurzmeyer Beat het denn d’Kochlöffu afo schwinge
Um die Kochkünscht chönne z’gniesse hätsch schnäu müesse si
Im Beat si Zyt aus Beizer, isch nach es paar Wuche scho verbi
     
  S’isch Chlauseumzug z’Bauschtu uf de Gasse
D’Lüt chöme cho luege i grosse Masse
Knapp vor em Umzug gsesch dr Rusch ufem Lieferwägeli posiere
A fordeschter Front tuet är die Chläus fotografiere
Was är haut no sött lehre isch, dass är nid um z’verrecke
Bim Föttele aune Lüt tuet d’Sicht verdecke
     
 
Was isch au mit em Hakan Yakin los
Basu, Paris, Stuttgart oder Boca Juniors
Wenn sovüu im Zügs umefahrsch bisch kei Gfitzte
Wenn di us Raser uf dr Autobahn losch lo blitze
Jetz goht das Röckli i d’Türkei, o weh
Mir si sicher, es goht nid lang ohni Mama Emine
     
  Dr Lappert isch sit letscht Johr unger emene komische Verdacht
Dr Olivier is Pintli, dr Ramon i d’Schmitte und dr Mäsu i d’Eintracht
Dr Lässer und dr Garritano het är usem Chrüz gschpediert
Und S’Rössli wird ar Fasnacht gschlosse wöus nid rändiert
Ä r „gnagi“ nid am Hungertuech ghörsch ne chlöne
Ä r loht sich lieber vo de heisse Bei lo verwöhne
     
  Dr Rütti Max isch e armi Sau
Aues, wo er ufschtöut wird Opfer vom Radau
Z’erscht hei si Ihm s’1. Auguscht-Füür abgfacklet
Denn au no grad dr Wiehnachtsbaum umghacket
Drum macht dr Max d’Holzflueh bim nöchschte Feschtakt
Es paar Täg vor- und nachhär zum Hochsicherheitstrakt
     
  Phonak isch e Firma, die schtöut Hörgrät här
Doch ir letschte Zyt liidet ihres Image schwär
Drum mache si jetz es Hörgrät für e spezielli Chundegruppe
Teschte wei si’s mit dr eigete Radsportgruppe
Mit dem Super-Grät chönntes aui Sportler vernäh
Dass me bim Sport kei Doping darf näh
     
  Dr Bättig Toni tuet bim Autoverchauf dra dänke,
Dass er im Chäufer kei Liter z’vüu Benzin tuet schänke
Er wott das Benzin absuuge mit emne Schluuch
Doch mit em Muu isch’s nid gange, das macht ihn duuch
Schliesslich het er’s mit em Staubsuuger probiert
Benzin isch zwar keis cho, derfür isch dä Suuger explodiert !
     
  D’Füürwehr tuet jetz verzwiiflet Lüüt sueche
S’Glück wei si mit de öutere Semeschter versueche
Im Anzeiger hei si’s im Januar inseriert
Ab Johrgang 1884 wärde d’Lüüt jetz rekrutiert
Dr Erfoug cha me nöchscht Johr go überprüefe
Ö b aui im Autersheim „Wasser marsch“ chöi rüefe
     
  Mit öisne Stüürgäuder het d’SBB gross inveschtiert
Und mit emne perfekte nöie Netz plagiert
Dr nöi SBB-Fahrplan isch nid so geniau
Er bringt nume Nachteil für öis im Thau
D’Verbindige wärde schlechter, und d’Billett döi si vertüüre
Derfür chasch dir am Oensiger Bahnhof länger dr Arsch abfrüre
     
  Es isch Obe, me tuet im Rauch ine sitze
D’Gmüeter vo de Lüüt döi sich langsam erhitze
Die einte schreie nach Fleisch, dr Mage knurrt
Die angere si sit Stunde scho wieder furt
So isch’s ergange i de gladne Gescht
Vom Eggeschwiler Wauti sim Geburtstagsfescht
     


















  Schnappi (Melody "Schnappi das kleine Krokodil")
Ab däm Johr isch’s schlimmer mit Promüu
S’zwöite Glas sigi mängisch jetz scho z’vüu
Wenn di nid dra hautisch, vergoht dir schnäu mou s’lache
Wöu d’Polizei tuet öfters Kontrolle mache


Schni Schna Schnappi, wär z’vüu sufft dä wird gschnappt
Schni Schna Schnappi, wär bsoffe fahrt wird gschnappt

D’Beizer ghörsch ir letschte Zyt chlöne
Bi 0,5 do chasch kei Gascht verwöhne
S’Blitz Taxi weiss d’Lösig für’s Problem
Für e Schnägg chunnsch hei ganz bequem


Schni Schna Schnappi, im Taxi wirdsch nid gschnappt
Schni Schna Schnappi, wär bsoffe fahrt wird gschnappt


Dr Eggi isch im Usgang, er het Durscht
D’Promüuegränze isch ihm derbi chli Wurscht
Ufem Heiwäg schtöi d’Tschugger uf dr Schtross
Und scho isch dr Eggi s’Billett los


Schni Schna Schnappi, dr Eggi hei si gschnappt
Schni Schna Schnappi, wär bsoffe fahrt wird gschnapp






































































Winstons Club Bilder

slogan_small300.png