header1200.png

Anlässe und Events vom Winstons Club Balsthal

Fasnacht 1998 Motto"Ab uf d'Insle"

Winston's Club Schnitzelbänke

fasnacht1998

Schnitzelbänke 1998
 

Zwee hei de Summer wöue probiere
Sich für’s nöchschte Eidgenössische z’qualifiziere
D’ Söhn vom Scherz und Jeggli hei gha de Splin
Steistosse wäri doch no Ihri Disziplin
Nür öppis hätt me dene zwene no säge müesse
dass me dört d’Stei i Sand, und nid i d’Auto tuet schiesse !


Vor em Füürwehrmagazin isch es Parkverbot
Dermit, wenn’s brönnt, keis Auto im Weg ume stoht
Dr Zisset Rolf het dört trotzdem parkiert
und au aus Kommandant prompt e Buess kassiert
Wenn de Platz ohni Strof zum parkiere wotsch benütze
Muesch halt di Chare in es Führwehrauto umsprütze


E eltere Herr und e jungi Frau chöme öppe mou zäme
Wenn dr Maa jung isch und d’Frau alt, döi si sich scho eher schäme
D’Nella Martinetti seit sich, ufrisse das chan ig au (oh bello ciao, bello ciao, bello ciao)
Sie risst sich e junge a Nagel, und stellt sich zur Schau
Dä Jung Schnippchen-Jäger , jo dä benide mir scho
zwee für eini het er bim Alter und bim Gwicht übercho


Die Bauschtler wo i d’Bez-Halle a d’Gmeindsversammlig si gange
Hei sich gfrogt, was söll das grusige Gstell wo ar Wand tuet hange
Dr Amme het mit em Broki hin- und her aufo renne
und mit em Liecht versuecht uf das Gebilde z’brenne
Nach langem studiere hei mir’s denn au gseh
Das, wo dr Wüthrich bastlet het, hätti e Linwand sölle geh !


Drei St. Galler Studente hei wöue probiere
Mit Bschisse bim Risiko go abkassiere
D’Amgarte het scho ir Hauptprob d’Froge vor Sendig gnoh
Via Zueschauer si die Antworte zum Kanditat cho
Sie hätte sich aber halt au sölle d’Froge ipräge
Dermit au dr Ramundo hät gwüsst, wenn er „Moldovan“ söll säge.


Vor Konkordia het me letscht’s Johr nid vüu ghört
Bis uf ne Ziitigsente, und die het se gschtört
Bim Ständeli uf dr Holzflueh zur Wiehnachtsfiir
Het me gläse es sig d’Konkordia, und Sie bestehi nur no ufem Papier
Doch was nähme mir us dere ganze Gschicht mit
Bir Konkordia bruchts scho e Druckfähler, dermit’s e Schlagziile git


Identischi Müüs und Ratte züchte, so het’s aagfange
Mit Schoof isch es nachhär wiitergange
Klone heisst ir Wüsseschaft dä nöischti Hit
Doch mir glaube nid, dass es das erscht sit gester git
Dr Clinton isch au klonet, do mache mir e Wett
Mir glaube nid, dass er ällei all die Fraue vernaschet het


Bir Olympiade het mer’s wieder mou chönne gseh
Bi de Snöber töi sogar d’Spitzesportler Droge neh
Sie wei eifach FUN und alles isch geil
Sogar s’Drogeproblem het für Sie e Vorteil
Me cha se i dr Lawine schneller lokalisiere
Indem d’Rettigsteam nöierdings au Drogehünd engaschiere


D’Wiehnachtsfiir tuet fründlich stimme
Am Fescht vor Liebi tuet me gärn Gschenkli überbringe
Im Löie hei sie a die beschte Gäscht dänkt
und dene e feini Fläsche Champagner gschänkt
Oeis nähmi haut jetz eifach no wunger
Wieso si do öisi Polizischte au drunger


Für Gmeindsbeamte het’s zwee Istelplätz geh
Dermit einzelni zum schaffe s’Auto hei chönne neh
Dr neui Gmeindrot isch dene Plätz uf d’Schlichi cho
und het se denn us ihrem Budget us gno
Au dr Heldstab cha jetz nümme gratis parkiere
Dem schadets jo au nüt, wenn er muess marschiere


Bingo Bongo was isch bi Dir gange mir chöme nid drus
mir hei müesse erfahre, Du sigisch Konkurs
Jetze fosch wieder vo fore a
Mit dr Pizzeria Bingo Bongo GmbH
Mir wüsste wie Du Di angerscht hättsch chönne kuriere
Machs wie d’Banke, tue mit em Pizza Huet fusioniere


Rüti, Bussme und Konsorte stecke ir Mid-Life Kriese
Jetz wie si au no de Franzose dr Nationalfiirig vermiese
Bis am 14. Juli wie si uf Paris marschiere
Und dört am Eiffelturm go e Hinkelstei montiere
Mir wünsche öich vüu Glück und döits au gniesse
Wenn die euch denn mit em Füürwerk ufe Mond ufe schiesse


Dr Gress isch jetz cho, dr Fringer macht d’Fuscht
Wenn d’Spieler schlecht spiele, wird dr Trainer ustuscht
Statt em Gress würde mir dört e Trainerin neh
Am ehschte täte mir d’Anita Weihermann gseh
D’Spieler chönnte viellicht d’Gegner besser päckle
Nach em Motto, Gring acheha u seckle seckle seckle


D’Räuber hei bir Fraumünschterposcht eifach chönne inefahre
Und mitneh was Platz gha het i ihrem Chare
Fingerabdrück, kei Maske und s’Geld schnell verprasse
So het se notürlich d’Polizei schnell chönne fasse
Eifach würdis s’nöchschte mou nume no go
wenn sie würde d’Adresse mit Fotti hingerloh

 



Winstons Club Bilder

slogan_small300.png